Fundargerðir

Bæjarstjórn Ölfuss - 322

Haldinn í Ráðhúsi Ölfuss,
02.11.2023 og hófst hann kl. 16:30

Fundinn sátu: Gestur Þór Kristjánsson forseti bæjarstjórnar,
Sigurbjörg Jenný Jónsdóttir 1. varaforseti,
Grétar Ingi Erlendsson bæjarfulltrúi,
Erla Sif Markúsdóttir bæjarfulltrúi,
Gunnsteinn R. Ómarsson 1. varamaður,
Vilhjálmur Baldur Guðmundsson bæjarfulltrúi,
Ása Berglind Hjálmarsdóttir bæjarfulltrúi,
Elliði Vignisson bæjarstjóri,
Sandra Dís Hafþórsdóttir sviðsstjóri,

Fundargerð ritaði: Sandra Dís Hafþórsdóttir, sviðsstjóri

Í upphafi fundar leitaði forseti eftir athugasemdum við fundarboðið. Athugasemd kom frá bæjarfulltrúum B- og H-lista og lagði Ása Berglind Hjálmarsdóttir fram eftirfarandi bókun fyrir þeirra hönd:

Við viljum gera athugasemd um að mál sem við fulltrúar H og B lista lögðum fram fyrir dagskrá bæjarstjórnarfundar, um kynningu Brimbrettafélagsins, hafi ekki verið sett á dagskrá fundarins. Félagið óskaði sjálft eftir því að fá að koma sínum sjónarmiðum á framfæri á næsta fundi bæjarstjórnar í tölvupósti dagsettum 16. október, en var ekki svarað sem varð til þess að fulltrúar H og B lista lögðu erindið fram sem mál fyrir fundinn. Nýleg fordæmi eru fyrir því að hagsmunaaðilar séu með kynningu á fundi bæjarstjórnar Ölfuss. Samkvæmt 27. gr. Sveitarstjórnarlaga um rétt til að bera upp mál segir: Sveitarstjórnarmaður á rétt á að tekið verði á dagskrá sveitarstjórnarfundar hvert það málefni sem sérstaklega varðar hagsmuni sveitarfélagsins eða verkefni þess. Í 10. gr. í samþykktum sveitarfélagins segir einnig að á dagskrá bæjarstjórnarfunda skal m.a. taka fyrir mál sem bæjarfulltrúar óska eftir að tekin verði á dagskrá.

Gestur Þór Kristjánsson tók til máls og lagði fram eftirfarandi bókun fyrir hönd bæjarfulltrúa D-lista:

Álits Guðjóns Bragasonar lögfræðings var leitað og í því kemur fram að um rétt sveitarstjórnarmanna til að fá mál tekið á dagskrá segi í 1. mgr. 27. gr. sveitarstjórnarlaga nr. 138/2011:
,,Sveitarstjórnarmaður á rétt á að tekið verði á dagskrá sveitarstjórnarfundar hvert það málefni sem sérstaklega varðar hagsmuni sveitarfélagsins eða verkefni þess." Ágreiningslaust er að það mál sem er tilefni erindisins verði tekið á dagskrá fundar bæjarstjórnar. En af umræddu lagaákvæði leiðir ekki að bæjarfulltrúi hafi jafnframt rétt til að ákveða hvort gestir verði boðaðir á fund til að gera grein fyrir afstöðu sinni í tilteknu máli.

Ása Berglind Hjálmarsdóttir tók til máls og lagði fram eftirfarandi bókun fyrir hönd bæjarfulltrúa B- og H-lista:

Í áliti frá Önnu Kristínu Agnarsdóttur segir að ein af skyldum sveitarstjórnar sé að gæta að almennum hagsmunum íbúa sveitarfélagsins, sbr. 2. málsl. 2. mgr. 24. gr. sveitarstjórnarlaga nr. 138/2011. Neitun til handa sveitarstjórnarmanni og fulltrúa almennings til þess að bera upp málefni á dagskrá á bæjarstjórnarfundi brýtur gegn ákvæði 1. mgr. 27. gr. sveitarstjórnarlaga þar sem skýrt er kveðið á um að sveitarstjórnarmaður á rétt á að tekið verði til umfjöllunar, og á dagskrá sveitarstjórnarfundar, hvert það málefni sem sérstaklega varðar hagsmuni sveitarfélagsins eða verkefni þess. Sömuleiðis gætir slík neitun ekki jafnræðis skv. 11. gr. eða meðalhófs skv. 12. gr. stjórnsýslulaga nr. 37/1993. Ekki verður því séð að neitun formanns bæjarstjórnar standist lög.

Elliði Vignisson tók til máls.

Dagskrá:

Almenn mál

1. 1806017 - Kosning í nefndir og ráð Sveitarfélagsins Ölfuss.

Breyting á fulltrúum D-lista í framkvæmda- og hafnarnefnd og fjölskyldu- og fræðslunefnd.

Eiríkur Vignir Pálsson hefur beðist lausnar sem formaður framkvæmda- og hafnarnefndar. Lagt er til að Guðbergur Kristjánsson taki sæti Eiríks og verði jafnframt formaður nefndarinnar.
Samþykkt samhljóða.

Einnig er lagt til að Davíð Arnar Ágústsson taki sæti sem aðalmaður í fjölskyldu- og fræðslunefnd í stað Guðbergs Kristjánssonar og að Haraldur Guðmundsson verði varamaður í sömu nefnd.
Samþykkt samhljóða.

2. 2310072 - Veiting prókúru til sviðsstjóra fjármála- og stjórnsýslusviðs

Bæjarstjóri óskar eftir heimild til að veita sviðsstjóra fjármála- og stjórnsýslusviðs prókúru fyrir Sveitarfélagið Ölfus sbr. heimild í 51.gr. samþykkta Sveitarfélagsins Ölfuss.

Bæjarstjórn samþykkir að veita sviðsstjóra fjármála- og stjórnsýslusviðs prókúru fyrir Sveitarfélagið Ölfus sbr. heimild í 51.gr. samþykkta Sveitarfélagsins Ölfuss.

Samþykkt samhljóða.

3. 2306049 - DSK Breyting á skipulagi hafnarsvæðis - landfylling

Breyting á deiliskipulagi hafnarsvæðis hefur verið auglýst og komu ábendingar frá Umhverfisstofnun auk nokkurra athugasemda frá brimbrettaiðkendum þar á meðal frá Brimbrettafélaginu.
Einnig fékk skipulagsfulltrúi spurningu frá Skipulagsstofnun sem benti á að skoða þyrfti hvort senda ætti inn matsspurningu vegna framkvæmdarinnar, hvort framkvæmdin væri í samræmi við aðalskipulag og bent að að spurning væri hvort landfyllingin væri á friðlýstu svæði.
Hafnarnefnd hefur fjallað um málið og ályktað að einungis sé þörf á um helmingi þeirrar landfyllingar sem fyrirhuguð var. Þannig þurfi hún að ná 70 metra til suðurs frá Suðurvarargarði en ekki 140 metra í átt að útsýnisskífunni eins og fyrirhugað var í upphaflegri tillögu sem var auglýst.
Í viðhengi er tillaga að svari til brimbrettaiðkanda, svar skipulagsfulltrúa til Skipulagsstofnunnar og minnisbréf sem viðbrögð við ábendingum Umhverfisstofnunar.

Afgreiðsla nefndar: Sigurður Áss Grétarsson, ráðgjafi sveitarfélagsins í hafnarmálum, mætti á fundinn og gerði grein fyrir ýmsum hliðum málsins, meðal annars þeim fjárhagslegu.

Nefndin beinir því til bæjarstjórnar að skipulagsfulltrúa verði falið að ganga frá málinu í samræmi við 1. málsgrein 42. greinar skipulagslaga nr. 123/2010 m.s.br.
Nefndin vil árétta að tillagan er í samræmi við aðalskipulag. Einnig liggur fyrir jákvætt svar við matsspurningu frá því þegar Suðurvarargarður var lengdur og færður, nýlega sem enn er í fullu gildi, en þá var úrskurðað að framkvæmdin þyrfti ekki að fara í umhverfismat. Einnig er áréttað að framkvæmdin kemur hvergi nærri friðlýstu svæði.

Skipulagsfulltrúa falið að svara framkomnum athugasemdum í samræmi við tillögur í viðhengi.

Málið borið upp til atkvæða og greiddu þrír fundamenn D-lista atkvæði fyrir samþykki þess að fyrirliggjandi tillaga yrði send til samþykktar Skipulagsstofnunnar. Hrönn Guðmundsdóttir fulltrúi B-lista greiddi atkvæði gegn tillögunni og Vilhjálmur Baldur Guðmundsson fulltrúi B-lista sat hjá.

Nefndin í heild sinni hvetur Brimbrettafélagið til þess að opna viðræður við sveitarfélagið um bætta aðkomu niður í fjöruna.

Ása Berglind Hjálmarsdóttir tók til máls og lagði fram eftirfarandi tillögu fyrir hönd B- og H-lista:

Af virðingu við náttúruna og framtíðarkynslóðir þá leggjum við til að hætt verði við þessa umdeildu framkvæmd og landfylling endurhönnuð í samstarfi við Brimbrettafélagið.
Bæjarfulltrúar B- og H-lista

Tillaga Ásu Berglindar var sett í atkvæðagreiðslu og hún felld með 4 atkvæðum bæjarfulltrúa D-lista. Bæjarfulltrúar B- og H-lista greiddu atkvæði með tillögunni.

Grétar Ingi Erlendsson tók til máls og lagði fram eftirfarandi tillögu fyrir hönd bæjarfulltrúa D-lista:

Bent er á að skv. nýsamþykktu aðalskipulagi Ölfuss sem samþykkt var einróma í bæjarstjórn Ölfuss og staðfest hjá Skipulagsstofnun 17.11.22 er umrætt svæði sem landfyllingin kemur á skilgreint sem V (vötn, sjór og ár) í aðalskipulagi, þar kemur fram að „heimilaðar séu breytingar á viðleguköntum og sjóvarnargörðum í samræmi við aðliggjandi landnotkun á landi og/eða deiliskipulags.“

Aðliggjandi landnotkun er skilgreind sem H (hafnir) í aðalskipulagi, þar kemur fram að heimilt sé:
*Að stækka höfnina svo hægt verði að taka á móti stærri skipum en nú er mögulegt.
*Að efla starfsemi tengda sjósókn og flutningum á sjó.
*Að tryggja fyrirtaks aðstöðu fyrir flutningastarfsemi og aðra hafnsækna starfsemi.
*Að tryggja nægjanlegt framboð rúmra lóða fyrir hafnsækna starfsemi.

Komið hefur fram að tillaga um landfyllingu á svæði V er í samræmi við aðalskipulag. Einnig liggur fyrir jákvætt svar við matsspurningu frá því þegar Suðurvarargarður var lengdur og færður nýlega, sem enn er í fullu gildi, en þá var úrskurðað að framkvæmdin þyrfti ekki að fara í umhverfismat. Einnig er áréttað að framkvæmdin kemur hvergi nærri friðlýstu svæði.

Rétt er að hafa hugfast að fagnefndir sveitarfélagsins hafa ítrekað rætt þetta mál. Málið var upphaflega kynnt í framkvæmda- og hafnarnefnd 21.júní sl. þar sem því var visað í skipulagsferil án mótatkvæða. Umhverfis- og skipulagsnefnd afgreiddi málið einnig frá sér einróma og samþykkti að skipulagsfulltrúa yrði falið að auglýsa tillöguna 5. júlí sl. Það var svo staðfest af bæjarráði 20. júlí enn og aftur án mótatkvæða eða bókunar. Eftir það kom málið ásamt athugasemdum og málamiðlunartillögum til umfjöllunar á fundum fagnefnda nú síðast í umhverfis- og skipulagsnefnd 30. okt. og þar áður framkvæmda- og hafnarnefnd 18. okt. Þær fundargerðir eru einmitt til staðfestingar hér á fundi bæjarstjórnar í dag. Málið hefur því fengið vandlega umfjöllun og rýningu.

Eitt af því sem komið hefur fram í umfjöllun um málið er það álit hafnarverkfræðings sem hefur unnið að og stýrt endurbótum á höfninni að fyllingin muni ekki hafa nein áhrif á öldufar sunnan við útsýnispall. Endurkast sé óverulegt vegna grjótgarðs og muni endurkastast í átt að suðurvaragarði en ekki til baka.

Í nýlegum svörum hans til félags brimbrettafólks segir m.a.:
„Landfyllingin mun ekki hafa áhrif á öldufar á "brimbrettasvæðinu" og þar með á "brimbrettaölduna". Það er ekki neinn vafi í mínum huga að "brimbrettaaaldan" verður ekki fyrir áhrifum af þessum aðgerðum enda fer landfyllingin bara út að stórstraumsfjöruborði þannig að hún verður öll í "fjörunni" og fjaran við útsýnispallinn nær mun lengra út. Það er minn einlægur ásetningur að eyðileggja ekki þessa öldu fyrir brimbrettaiðkendum og ef það væri minnsti vafi um það í mínum huga þá hefði ég ekki lagt þetta til."

Þá er að lokum bent á að það er ekki tilviljun að ráðist er í þessa uppfyllingu á þessum stað við hlið nýs viðlegukants sem tekið getur á móti allt að 200 m. löngum skipum en í dag er eingöngu hægt að taka á móti 140 m löngum skipum. Þótt uppfyllingin sé ekki stór þá verður þar til mikilvægt athafnarsvæði sem nýtist til þjónustu þessara skipa. Komi til þess að þarna verði til byggingalóðir, sem enn er með öllu óvíst fara þær lóðir til úthlutunar samkvæmt reglum hjá sveitarfélaginu.

Með þetta í huga leggjum við til að ákvörðun fagnefndarinnar verði staðfest og að skipulagsfulltrúa verði falið að ganga frá málinu í samræmi við 1. málsgrein 42. grein skipulagslaga nr. 123/2010 m.s.br.

Ákvörðun þessa teljum við best tryggja heildarhagsmuni íbúa sveitarfélagsins.
Bæjarfulltrúar D-lista.

Gunnsteinn Ómarsson tók til máls og lagði fram eftirfarandi bókun fyrir hönd bæjarfulltrúa B- og H-lista:

Með þessari aðgerð er verið að skemma eða jafnvel eyðileggja einstaka náttúruperlu og verðmætt svæði sem gæti orðið gríðarlega verðmætt til framtíðar. Það eru fáir staðir í sveitarfélaginu og á landinu öllu sem eru jafn einstakir af náttúrunnar hendi eins og sá sem hér um ræðir. Hér er verið að fórna meiri hagsmunum fyrir minni og rökin fyrir þessari framkvæmd eru ekki nógu sterk.
Bæjarfulltrúar B- og H-lista

Tillaga Grétars lögð í atkvæðagreiðslu og hún samþykkt með 4 atkvæðum bæjarfulltrúa D-lista, bæjarfulltrúar B- og H- lista greiddu atkvæði gegn tillögunni.

4. 2309060 - DSK Thor Fiskeldi við Keflavík

Landslag leggur fram beiðni fyrir hönd fiskeldisstöðvarinnar Thor landeldi ehf. þar sem óskað er eftir heimild til að hefja vinnu við gerð deiliskipulags fyrir nýja fiskeldisstöð vestan Þorlákshafnar.

Einnig er lögð fram skipulags- og matslýsing deiliskipulags stöðvarinnar. Áform eru um uppbyggingu á fiskeldisstöð fyrir lax, bleikju eða regnbogasilung.

Í lýsingunni koma fram helstu áherslur við deiliskipulagsgerðina og upplýsingar um forsendur og stefnu og fyrirhugað skipulagsferli.

Afgreiðsla nefndar: Heimild veitt til að hefja deiliskipulagsgerð. Nefndin beinir því til bæjarstjórnar að skipulagsfulltrúa verði falið að auglýsa skipulagslýsinguna í samræmi við 40 gr. skipulagslaga nr. 123/2010 m.s.br.