Fundargerðir

Bæjarráð Ölfuss - 377

Haldinn í Ráðhúsi Ölfuss,
30.06.2022 og hófst hann kl. 08:15

Fundinn sátu: Grétar Ingi Erlendsson formaður,
Sigurbjörg Jenný Jónsdóttir aðalmaður,
Hrönn Guðmundsdóttir aðalmaður,
Ása Berglind Hjálmarsdóttir áheyrnarfulltrúi,
Sandra Dís Hafþórsdóttir sviðsstjóri,

Fundargerð ritaði: Sandra Dís Hafþórsdóttir, sviðsstjóri

Dagskrá:

Almenn mál

1. 2206070 - Náttúruskólinn að Alviðru

Erindi frá stjórn Alviðrufélags og stjórnar Landverndar, dags. 29. maí, þar sem óskað var eftir að sveitarfélög taki í sameiningu að sér að fjármagna launakostnað starfsmanns Alviðru vegna fræðslustarfs fyrir grunnskólabörn.

Bæjarráð getur ekki orðið við erindinu þar sem það rúmast ekki innan fjárhagsáætlunar en lýsir sig reiðubúið til að skoða aðra útfærslu á þessu fyrirkomulagi.

Samþykkt samhljóða.

2. 2206072 - Mat á fjárhagslegum áhrifum framkvæmda við nýjan leikskóla-minnisblað

Í 66 gr. sveitarstjórnarlaga nr. 138/2011 er m.a. fjallað um miklar fjárfestingar og skuldbindingar sveitarfélaga en þar kemur fram að áður en sveitarstjórn tekur ákvörðun um fjárfestingu, framkvæmd eða aðra skuldbindingu sem nemur hærri fjárhæð en 20% af skatttekjum sveitarfélagsins viðkomandi reikningsár er skylt að mat sé framkvæmt af óháðum, sérfróðum aðila á áhrifum ákvörðunarinnar á fjárhag sveitarfélagsins.

Fyrir liggur að fyrirhugað er að byggja nýjan leikskóla í Þorlákshöfn við nýja deiliskipulagið Vesturberg, vestanmegin við núverandi byggð. Við hönnun skólans verði miðað við fjögurra til sex deilda leikskóla fyrir nemendur á aldrinum 12 mánaða til 6 ára. Skólinn gæti rúmað allt að 110 nemendur fullbyggður.

Á ofanreindum forsendum fól Sveitarfélagið Ölfus RR ráðgjöf (nú KPMG) að leggja mat á áhrif nýrrar leikskólabyggingar á fjárhag sveitarfélagsins í samræmi við 66. grein sveitarstjórnarlaga. Matið er byggt á fjárhagsáætlun.

Samkvæmt fyrirliggjandi fjárhagsáætlunum og framlögðum gögnum um fjárfestingar og rekstraráhrif virðist sveitarfélagið vera í stakk búið til að ráðast í framkvæmdir og rekstur nýs leikskóla.

Fjárfestingin stenst viðmið allra þriggja megin reglna um fjármálastjórn sveitarfélaga. Fjárfesting vegna leikskólans er veruleg á tímabilinu 2022 til 2023 og að miklu leyti fjármögnuð með lántökum þannig að skuldsetning eykst sem og greiðslubyrði lána. Samkvæmt fyrirliggjandi áætlunum sveitarfélagsins mun handbært fé frá rekstri standa undir afborgunum lána á árunum 2022 til 2025.

Útlit er fyrir að fjárhagur sveitarfélagsins muni veikjast til skemmri tíma vegna framkvæmda nýs leikskóla og aukinnar skuldsetningar. Svigrúm til annarra fjárfestingarverkefna mun því minnka.

Bæjarráð þakkar upplýsingarnar og felur starfsmönnum áframhaldandi undirbúning vegna byggingar nýs leikskóla.

3. 2206074 - Umsókn um námsvist utan lögheimilissveitarfélags.

Bæjarráð samþykkir erindið.

4. 2206034 - Auðsholt - Krafa um endurköllun skipulags og merkingu aðgegngisslóða

Nefndinni hefur borist bréf frá landeigendum Auðsholtshjáleigu sem vekja athygli á því að landamerki sem sýnd eru á nýsamþykktu deiliskipulagi Auðsholts eru ekki rétt. Þau krefjast þess að skipulagið verði fellt úr gildi. Landeigendurnir setja sig ekki á móti því að nýtt skipulag verði gert þar sem landamerkin verði sýnd rétt og aðgengisslóðar sem tekist hefur verið á um verði sýndir og þess gætt að byggingarreitir og slóðinn skarist ekki. Athugun skipulagsfulltrúa hefur leitt í ljós að landamerkin voru ranglega færð inn á kort í gagnagrunni Þjóðskrár sem skipulagshöfundur lagði til grundvallar fyrir vinnu sinni.

Afgreiðsla nefndar: Nefndin beinir því til bæjarstjórnar að skipulagsfulltrúa verði falið að birta auglýsingu í B-deild Stjórnartíðinda sem fellir deiliskipulag Auðsholts úr gildi. Í ljósi þess að Þjóðskrá hefur lagfært sín gögn og að landamerki eru röng í deiliskipulaginu er ekki annar kostur í stöðunni en að fella deiliskipulagið úr gildi og vinna nýtt skipulag með réttum landamerkjum þar sem aðkoma að landareignum beggja aðila er sýnd og kvöð um hana.