Fundargerðir

Bæjarstjórn Ölfuss - 327

Haldinn í Ráðhúsi Ölfuss,
29.02.2024 og hófst hann kl. 16:30

Fundinn sátu: Gestur Þór Kristjánsson forseti bæjarstjórnar,
Sigurbjörg Jenný Jónsdóttir 1. varaforseti,
Grétar Ingi Erlendsson bæjarfulltrúi,
Erla Sif Markúsdóttir bæjarfulltrúi,
Hrönn Guðmundsdóttir bæjarfulltrúi,
Vilhjálmur Baldur Guðmundsson bæjarfulltrúi,
Ása Berglind Hjálmarsdóttir bæjarfulltrúi,
Elliði Vignisson bæjarstjóri,
Sandra Dís Hafþórsdóttir sviðsstjóri,

Fundargerð ritaði: Sandra Dís Hafþórsdóttir, sviðsstjóri

Í upphafi fundar leitaði forseti eftir athugasemdum við fundarboð en engar bárust.

Dagskrá:

Almenn mál

1. 2402081 - Umræða um náttúruhamfarir í nágrannasveitarfélaginu Grindavík og mögulega aðstoð við íbúa

Sigurbjörg Jenný Jónsdóttir, Ása Berglind Hjálmarsdóttir, Hrönn Guðmundsdóttir, Grétar Ingi Erlendsson og Elliði Vignisson tóku til máls.

Sigurbjörg Jenný Jónsdóttir lagði fram eftirfarandi tillögu fyrir hönd bæjarfulltrúa D-lista:

Sú staða sem íbúar Grindavíkur standa nú frammi fyrir er ógnvænleg. Ófyrséð er hver framtíð byggðar í Grindavík verður og hvernig öryggi fólks þar verður tryggt enda nú hafinn undirbúningur fyrir sjöunda eldgosið á tæpum þremur árum. Við upphaf hamfaranna bjuggu 3.720 manns í sveitarfélaginu og þar voru 1.664 eignir.
Til að mæta viðkvæmri stöðu nágranna sinna samþykkti fjölskyldu- og fræðslunefnd Ölfuss strax í upphafi hamfaranna að Grindvíkingar hefðu sama aðgengi að þjónustu hér og íbúar með lögheimili í Ölfusi. Þar með var vikið frá reglum sveitarfélagsins um félagslegt leiguhúsnæði þannig að þeir sem eru 67 ára og eldri og hafa lögheimili í Grindavík sé nú heimilt að sækja um leiguíbúðir sem ætlaðar eru þeirra aldurshópi.
Þá var einnig veitt undanþága á lögum um leikskóla nr. 90/2008 og grunnskóla nr. 91/2008. Leik- og grunnskólar í Sveitarfélaginu Ölfusi buðu þar með börn á leik- og grunnskólaaldri frá Grindavík velkomin í skólana.
Á seinustu vikum hefur umtalsverður fjöldi Grindvíkinga leitað eftir lóðum í Þorlákshöfn. Í öllum tilvikum hefur verið leitað eftir einbýlishúsa- og eða parhúsalóðum sem fólk hefur hug á að byggja sjálft á.
Sveitarfélagið Ölfus vill með öllum leiðum sýna nágrönnum sínum stuðning og leggur áherslu á að sá vilji sjáist í verki.

Tillaga
Með það að leiðarljósi að styðja við Grindvíkinga á tímum náttúruhamfara samþykkir bæjarstjórn eftirfarandi:

1. Stefnt er að því að auglýsa næsta áfanga við svokallað Vesturberg í mars. Þar er um að ræða lóðir fyrir 10 einbýlishús, 10 parhús, og 1 raðhús. Alls verða þar því lausar lóðir fyrir 33 íbúðir. Hægt verður að hefja byggingarframkvæmdir á þessum lóðum í apríl. Bæjarstjórn samþykkir að veita fólki með lögheimili í Grindavík forgang að þessum lóðum. Samhliða felur bæjarstjórn starfsmönnum sínum að móta úthutunarreglur sem koma í veg fyrir spákaupmennsku og brask með þessar lóðir enda tilgangurinn sá einn að mæta neyð Grindvíkinga og þörf þeirra fyrir framtíðarheimili. Skal þar ma. gert ráð fyrir að ekki verði hægt að hafa eigendaskipti að fasteigninni fyrr en amk. 12 mánuðum eftir lokaúttekt nema með sérstakri samþykkt sveitarfélagsins.

2. Verði umframeftirspurn við úthlutun þessara lóða mun Sveitarfélagið Ölfus tafarlaust ráðast í útboð gatnagerðar í næsta áfanga við Vesturbergið og auglýsa þær á sömu forsendum. Þar gæti orðið mögulegt að úthluta lóðum fyrir allt að 13 einbýlishús og 7 parhús eða samtals 27 íbúðir. Í heildina gæti því orðið um að ræða lóðir fyrir allt að 60 heimili sem yrðu tilbúnar til framkvæmda á næstu mánuðum.

3. Verði áfram eftirspurn eftir lóðum eftir úthlutun þessara lóða verður frekari framkvæmdum flýtt enn frekar og stefnt að því að sem fyrst verði hægt að úthluta til viðbótar allt að 18 einbýlishúsalóðum 9 raðhúsalóðum og 9 parhúsalóðum. Þar verði því um að ræða 67 íbúðir. Samtals verði því mögulegt að úthluta lóðum fyrir allt að 127 íbúðir svo fljótt sem verða má.

Tillagan var borin undir fundinn og samþykkt samhljóða.

2. 2401035 - Boð til bæjarfulltrúa um þátttöku í vinabæjarmóti

Málið var áður á dagskrá bæjarráðs Ölfuss 01.02.2024 og var eftirfarandi bókað:

,,Bæjarráð beinir erindinu til umfjöllunar í bæjarstjórn.
Samþykkt samhljóða."

Grétar Ingi Erlendsson, Elliði Vignisson og Hrönn Guðmundsdóttir tóku til máls.

Bæjarstjórn tekur vel í erindið og samþykkir að greiða kostnað vegna þátttöku fyrir allt að tvo bæjarfulltrúa.

Samþykkt samhljóða.

3. 1906015 - Erindisbréf nefnda.

Fyrir bæjarstjórn lá endurskoðað erindisbréf fjölskyldu- og fræðslunefndar til staðfestingar. Fjölskyldu- og fræðslunefnd hefur fengið kynningu á bréfinu á fundi nefndarinnar 21.02.2024.

Bæjarstjórn staðfestir hið endurskoðaða erindisbréf fjölskyldu- og fræðslunefndar.

Samþykkt samhljóða.

4. 2004007 - Dagvistun - heimgreiðslur til foreldra

Endurskoðun á reglum um heimgreiðslur. Reglurnar hafa farið til umsagnar hjá fjölskyldu- og fræðslunefnd.

Bæjarstjórn samþykkir endurskoðaðar reglur um heimgreiðslur.

Samþykkt samhljóða.

5. 2305063 - Ráðgefandi samráð í barnavernd

Fyrir fundinum liggur samningur milli Hveragerðisbæjar og Sveitarfélagsins Ölfuss um rekstur á sameiginlegri barnaverndarþjónustu í samræmi við 11.gr. barnaverndarlaga nr. 80/2002. Málið var áður til umfjöllunar í bæjarstjórn 25.janúar sl. og hlaut umfjöllun á 18.fundi fjölskyldu- og fræðslunefndar 21.febrúar sl. þar sem eftirfarandi var bókað:

,,Nefndin samþykkir samninginn samhljóða. Áhersla er lögð á að útfærðar verði verklagsreglur í samræmi við það sem samningurinn kveður á um. Málinu vísað til endanlegrar samþykktar til bæjarstjórnar."

Bæjarstjórn samþykkir samninginn.

Samþykkt samhljóða.

6. 2402075 - Móttaka flóttafólks - erindi frá H-lista

Erindi frá Ásu Berglindi Hjálmarsdóttur bæjarfulltrúa H-lista.

Nú þegar aukning er á fjölda þeirra sem þurfa að koma til Íslands til að leita skjóls frá erfiðum aðstæðum í sínu heimalandi þá langar mig að fá upplýsingar um það hvernig Sveitarfélagið Ölfus hefur lagt sitt af mörkum í þeim efnum.

- Hefur sveitarfélagið lýst sig viljugt til að vera á meðal þeirra sveitarfélaga sem hafa undirritað samning um móttöku flóttafólks, eins og hefur verið gert í Árborg, Múlaþingi, Höfn í Hornafirði, Borgarnesi, Akranesi, Ísafirði og víðar?
- Ef ekki, stendur til að gera það og ef svo hvenær?
- Ef ekki, og ekki stendur til að gera það, þá kalla ég eftir skýringum á því af hverju sú stefna er tekin.

Grétar Ingi Erlendsson tók til máls og lagði fram eftirfarandi bókun fyrir hönd D-lista:

Vorið 2022 lýsti bæjarráð yfir einlægum vilja til að veita sem mesta og besta mannúðaraðstoð við móttöku flóttafólks. Í framhaldi af því var ráðist í umfangsmikla vinnu við að kortleggja húsnæðismarkað, þol innviða og vilja ríkisvaldsins til aðkomu. Eins og búist var við var mikill hörgull á heppilegu húsnæði helsta hindrunin. Í þeirri stöðu var leitað til stéttarfélaganna með að nýta orlofshús í Ölfusborgum undir úrræði til móttöku flóttafólks. Ekki reyndist forsenda fyrir slíku samstarfi.
Sveitarfélagið Ölfus hefur í öllum tilvikum reynt að mæta fyrirspurnum Félags- og vinnumarkaðsráðuneytisins um samstarf vegna móttöku flóttafólks. Á sama máta hefur því flóttafólki sem leitað hefur stuðnings hjá sveitarfélaginu verið veittur allur mögulegur stuðningur, allt frá fjárhagsstuðningi yfir í stuðning við atvinnuleit. Sami stuðningur verður áfram veittur.

Ása Berglind Hjálmarsdóttir, Hrönn Guðmundsdóttir og Elliði Vignisson tóku til máls.

7. 2402076 - Staða á vinnu við atvinnustefnu Ölfuss - erindi frá H-lista

Erindi frá Ásu Berglindi Hjálmarsdóttur bæjarfulltrúa H-lista.

Á bæjarstjórnarfundi 15. des. 2022 lögðu fulltrúar H- og B-lista fram fyrirspurn um gerð atvinnustefnu sveitarfélagsins, stöðu þeirrar vinnu og hvert framhaldið væri. Þá kom fram að 2. febrúar 2022, fyrir rúmum tveimur árum, var Ölfus Cluster falið að hefja þá vinnu og þar kom líka fram að stefnt væri að því að þeirri vinnu yrði að fullu lokið og að atvinnustefnan yrði tilbúin á fyrsta ársfjórðungi 2023. Í framhaldi kom fulltrúi Ölfus Cluster á fund bæjarstjórnar 23. febrúar 2023 til að kynna tímalínu og þá vinnu sem framundan væri. 18. apríl 2023 fékk bæjarráð kynningu frá Ölfus Cluster þar sem fram kom að undirbúningur fyrir íbúakönnun væri á lokametrum sem og tímasetningar fyrir íbúafundi sem áttu að vera liður í þessari vinnu.

Nú er ekki nema eðlilegt að spyrja aftur sömu spurningu og 15. desember 2022:
- Hver er staðan á gerð atvinnustefnu Ölfuss?
- Hver er núverandi og uppfærð tímalína á þeirri vinnu sem þarf að eiga sér stað til að móta stefnuna?

Með fullri virðingu fyrir Ölfus Cluster þá vil ég einnig leggja fram tillögu um að utanaðkomandi sérfræðingur verði fenginn til þess að leiða þessa vinnu líkt og gert var með menntastefnu Ölfuss sem var ferli sem heppnaðist vel.

Erla Sif Markúsdóttir tók til máls og lagði fram eftirfarandi bókun fyrir hönd bæjarfulltrúa D-lista:

Fyrir liggur að á seinustu árum hefur verið unnið að fjölmörgum verkefnum sem öll eiga það sameiginlegt að falla undir þá atvinnustefnu sem sveitarfélagið hefur markað með aðalskipulagi og öðrum formlegum samþykktum. Í því samhengi er rétt að minna á að fyrirtæki þurfa ekki formlegt samþykki frá sveitarstjórn til þess að hefja starfsemi svo fremi sem hún falli að þeim viðmiðum sem lögð eru með deili- og aðalskipulagi.
Samkvæmt upplýsingum frá Ölfus Cluster er staða við undirbúning að atvinnustefnu nú þannig að íbúakönnun er að verða tilbúin að fara út í loftið en vegna ábendinga frá persónuverndarfulltrúa sveitarfélagsins varð nokkur töf þar á. Gera þurfti breytingar á könnuninni til að könnunin myndi ekki brjóta í bága við persónuverndarlög. Þær breytingar verða klárar í vikunni og því reikna starfsmenn Ölfus Cluster með því að könnunin fari út í næstu viku.
Tilgangur könnunarinnar er að fá ákveðin grunn gögn frá íbúum til að vinna með áfram. Þegar þau gögn eru klár verða settir upp fundir með aðilum frá atvinnulífinu og starfsmönnum sveitarfélagsins síðan verður haldinn opinn vinnufundur með íbúum sveitarfélagins þar sem að grunnur að stefnunni verður lagður og drög að aðgerðaráætlun útbúinn.
Gert ráð fyrir að utanaðkomandi ráðgjafi komi til með að aðstoða við uppsetningu íbúafundar.

Hrönn Guðmundsdóttir, Grétar Ingi Erlendsson og Ása Berglind Hjálmarsdóttir tóku til máls.

Ása Berglind Hjálmarsdóttir bæjarfulltrúi H-lista lagði fram eftirfarandi bókun:

Uppbygging í atvinnulífinu í Ölfusi er hröð. Það er jákvætt að hér vilji fólk byggja upp fyrirtækin sín, búa og starfa. En það er ekki sama hvernig atvinnulífið byggist upp, það þarf að gerast í sátt við íbúa og umhverfi. Það er eðlileg krafa að í sveitarfélaginu sé unnið eftir vandaðri atvinnustefnu sem unnin er í góðu samráði við íbúa, atvinnulíf og aðra hagsmunaaðila. Það er mjög mikilvægt að farið sé af krafti í þessa vinnu tafarlaust.

8. 2401044 - Grímslækjarheiði ASK

Lögð er fram aðalskipulagslýsing fyrir Ytri Grímslæk ÍB17. Samkvæmt gildandi aðalskipulagi er heimild fyrir 19 íbúðum á svæðinu en breytingin gengur út á að þeim sé fjölgað í 25. Samhliða er lagt fram deiliskipulag fyrir Hraunkvíar sem er innan ÍB17.

Afgreiðsla nefndar: Nefndin beinir því til bæjarstjórnar að skipulagsfulltrúa verði falið að auglýsa aðalskipulagsbreytinguna og ganga frá málinu í samræmi við 31. gr. skipulagslaga nr. 123/2010.