Yfirlýsing frá Gámaþjónustunni hf.

Íslenska gámafélagið ehf, hefur gert kröfu um aðgang að öllum tilboðsgögnum Gámaþjónustunnar hf. , þar á meðal tilboðsskrám, í opinberu útboði á vegum sveitarfélagsins Ölfuss. Krafan var sett fram í miðju útboðsferli, einungis viku eftir að tilboð voru opnuð. Í útboðsgögnum er skýrt tekið fram að tilboðsskrár séu trúnaðarmál og er það í samræmi við áralanga hefð í slíkum útboðum bæði innan lands og utan. Þá hefð og þann trúnað vill úrskurðarnefnd um upplýsingamál nú rjúfa, sbr. úrskurð nefndarinnar nr. A 541/2014, en Gámaþjónustan hf. og Sveitarfélagið Ölfus vilja ekki sætta sig við þá niðurstöðu.  Ágreiningsmáli þessu verður því skotið til úrskurðar dómstóla eins og eðlilegt er í réttarríki.  Þess má geta að bæði Samband íslenskra sveitarfélaga og Samtök iðnaðarins telja mikilvægt að fá úr þessu skorið fyrir dómsstólum.