Englar á bókasafninu

Í gær var opnuð ný sýning í sýningarrými bókasafnsins, Gallerí undir stiganum. Þar gefur nú að líta englasafn Hafdísar Þorgilsdóttur, dagmóður í Þorlákshöfn. Hafdís hefur lengi safnað englum og eru þeir úr ýmsum áttum, minjagripir og heimatilbúnir englar. Einnig eru á sýningunni jesúmyndir sem Hafdís hefur sjálf málað.

Við sýningaropnun flutti þverflautukvartett, skipaður þeim Ólöfu Sigurðardóttur, Ingu Þórs Ingvadóttur, Unu Gautadóttur og Kristrúnu Gestsdóttur nokkur jólalög og Guðfinna Karlsdóttir las söguna Englajól eftir Guðrúnu Helgadóttur.

Englarnir hennar Hafdísar munu prýða sýningarrýmið allan desembermánuð og er hægt að skoða sýninguna á opnunartíma bókasafnsins.