Fyrstu tónleikar haustsins vöktu mikla lukku

Síðastliðið miðvikudagskvöld mætti til Þorlákshafnar brasilíska jasssöngkonan Jussanam da Silva og píanóleikarinn Agnar Már Magnússon, en þau eru á tónleikaferðalagi um norðurlöndin og hófu ferðalagið með tónleikum á Íslandi.  Á tónleikunum fluttu þau fjölda bossanova laga, en það er seiðandi brasilískur jass, í bland við íslensk lög, m.a. eftir Jón Múla Árnason og lag sem Páll Óskar Hjálmtýsson gerði frægt.

Tónleikarnir voru sérlega vel heppnaðir og héldu tónleikagestir alsælir og endurnærðir út í nóttina eftir tónleikana. Þeir sem misstu af tónleikunum geta andað rólega því þau Agnar og Jussanam verða með tónleika með sömu efnisskránni í í Tónlistarskóla Árnesinga næstkomandi laugardag.