Tunglfiskurinn kominn á sinn stað eftir viðgerð

Í vikunni var tunglfiskinum, sem hékk í glerrými ráðhússins, komið fyrir á sínum fyrri stað.  Fiskurinn hafði farið illa í hitanum og sólinni og var því farið með hann í lagfæringar og yfirhalningu til Steinars Kristjánssonar hamskera, en hann ásamt Ove Lundström, stoppaði fiskinn upp veturinn 2004-2005þ

Tunglfiskurinn sem er um tveggja metra langur og hár, veiddist í höfninni í Þorlákshöfn haustið 2004. Það voru félagar úr Slysavarnarfélaginu Mannbjörgu sem náðu fiskinum eftir að hafa áttað sig á að ekki var um hákarl að ræða. Þeir settu af stað fjáröflun til að safna peningum í uppstoppun á fiskinum og gáfu hann síðan til sveitarfélagsins og Byggðasafns Ölfuss.

Þegar ljóst var að sólin og hitinn færu illa með tunglfiskinn var skipt um gler í anddyrinu og gengið úr skugga um að ekki yrði jafn mikill hiti í rýminu.

Með góðri aðstoð var tunglfiskurinn hengdur upp og geta gestir nú heimsótt hann í Ráðhúsi Ölfuss, auk þess sem hægt er að skoða aðra uppstoppaða fiska og smádýr  sem geymdir eru í sýningarkössum fyrir framan bæjarskrifstofuna.