Umhverfisverðlaun Ölfuss 2016

Í ár voru veittar viðurkenningar fyrir snyrtilegt umhverfi fyrirtækja og bóndabýla.

Að þessu sinni hlutu Kristbjörg Eyvindsdóttir og Gunnar Arnarsson á Grænhól í Ölfusi viðurkenningu fyrir einstaklega snyrtilegt og skemmtilegt umhverfi. 

Þarna hefur verið vel hugsað um umhverfið og hús. Grænhól eignuðust Gunnar og Kristbjörg um síðustu aldamót. Þau hafa endurbyggt öll útihús á Grænhóli og eru nú með góð hesthús þar fyrir um 50 tamningahross. Þá hafa þau komið sér upp góðu íbúðarhúsi á Grænhóli, byggt þar glæsilega reiðhöll sem var vígð í lok ársins 2007 og haustið 2009 komu þau upp löglegum keppnisvöllum og skeiðbraut í fullri lengd heima á Grænhóli ásamt því að leggja reiðstíga um landið úr efni sem finna má í bæjarlandinu sjálfu. Umgengni öll á búinu hvort sem er utan húss eða innan er til stakra fyrirmyndar og mjög snyrtilegt heim að líta.